Гьеле имива чIивиди, йиз кьабир?
Аза узура. Салам, увуз салам!
Улубзри гъит яв гъазмайин гъваин
Хябяхъдин акв, нурлу апIру му аьлам.
БикIураза, гъалаб кIваъ апIури жин,
Уву дердер апIурашалва узкан.
Уву гьарган дийигъура, кIур, рякъ’ин,
Алабхьну яв кюгьне йирси булушка.
Ва увуз хябяхъдин укIу мучIушнаъ
Сикин дарди рябкъюравуз гьарган саб:
КичIирхбариъ ичкиханайиъ йиз кIваъ
Абсганси сар шли-вуш финарин гаркIал.
Баладарда, аьзиз! Йихьа архаин,
Дурар гьаци фикрар вуяв сикинсуз.
Думукьанди дубхънадарза кьутIкьлишин,
Гьамкьан ухди уву дяряркъди йикIуз.
Умунур вува улихьдиси уву,
Ва анжагъ сабдикан айиз кIваъ хиял,
Чкиди гьергну дарихмиш’валихьан му,
Кьяляхъ хътаркуз думу исчIли ихь хулаз.
Кьяляхъ гъюрза, гьатIарцциган цирклар чан
Лизи багъди ихь хьадукран вахтнаси.
Анжагъ сарун, тIалаб вуйиз, гьиринган
Узу михъирган миржид йис кьяляхъси.
Уягъ мапIан хиялар сарун имдру,
Бегьем дархьи кьастнак микипан гъалаб.
Йиз уьмриан шадвал ухди гъудубгну,
Гьисс гъапIунза ухди дердерин аьзаб.
Муулупан гъудган апIуз. Герек дар!
Гъубшубдихьна шуладар кьяляхъ хътаркуз.
Йиз кюмекра, шадвалра увутIан дар,
Уву вува узуз айи акв ялгъуз.
Гьаддиз гъалаб яв кIвак кайи гьапI кIваълан,
Фикрар мапIан, аьзиз, думукьан узкан.
МуудучIван думу рякъ’ина гвачIтIан,
Алабхьну яв кюгьне йирси булушка.
