Дийна йий хьо хIанз а, ва са йоккхи?
Со а ва. Аз хьога моаршал лу!
МаьркIижа хана, цу хьа цIалга лакхе,
Тамашийна лéпийла сердало.
Сога язду, Iа сагот ду, яхаш.
«Хьога сатессад хьа нанас!» – йоах.
«Каст-каста мáша тIакхелла никъ тIа йоалаш,
ЧIоагIа хьо цIаварга дог цо доах».
Шийца боадо яхьаш сайре еча,
Тарлу, нана, хьона духьал аха:
Тохаш суоме урс цхьанне са дега чу,
Гулбеннача харцахьбаьнна нах.
Из бакъдац, хьо царех ма тéша, нана,
Уж хабараш дувцараш харцлув!
Къаракъ мелаш лелац хӀаразваьнна.
Хьо ца гуш со лергвац, буъ аз дув.
Тхьовра санна, хIанз а ва со ховха.
ХIанз а, халахь, сатувсалга аз,
Саготонаш йицъяь, ваьнна новкъа,
Кхета цIенах, сона дитача дас.
Со цIавоагIаргва, вай сомий бéшара,
Ткъовронах ма кхийтте зизаш кIай.
ХIаьта, бархI шу хьалха мо, къа ца хеташ,
ЦIаьскарца со сóма ма ваккхлахь, хьай!
Сóма ма баккхалахь къайлабаьнна хьегам,
Хье ма делахь кхоачаш ца хиннар.
Дика яйзай сона хало, эшам,
Балах диза вахар са хиннад.
ДуӀаш де а со ма гIерта Iомве!
ДIадахáр кхы юхадерзаргдац.
Хьо цаI мара яц са дегá гIозле.
Сердало а хьо цаI мара яц!
Цудухь дита, нана, хьай сакъувлар.
Сох дог лазаш, Iа сагот ма де.
Мáша тIакхелла новкъа араювлар,
Са хьамсара нана, дIадицде.
