Ус-холдс пуп,
Ох велдмалд полдтанг.
Шушас пуп тынасхар хуват
Ванттыйс молдты сыр пормас.
Есялд шушас Балдда
Лдув сам ант уйтлдалдлды холдта.
«Муя, нанг аси, шенгк алданг нох килдсан?
Муен нанг такан си лдоватан каншлан?»
Пуп икелд ёхлдыя нюхмас: «Мосалд манэм
мит ху: лдэтот каврты, лдооват шавиты па лдайм ёшан каталдты йипулянг ат хошас.
Ахолдся мосятлдам симасялд хоят,
Рупитталд уранган унтын атат ант вохас?»
Балддайлд ястас: «Ма питлдам яма рупата верты,
Лэньлды па саманга веран шенгк метты.
Рупата миталд – талд сыс рупата яма ки верлдам,
Ма нангэн хулдам пуш вешлохтэн сэнылдам.
Лдапты нанг манэм полба солдамат».
Нумасты питас пуп,
Веншлохталд айлдта нэрты питсалдлды.
Айлдта ки сэнэмалдлды сюнь* талданга хасялд.
Моса па холдна веншлохат шавилда.
Пуп Балддая ястас: «Лдукашалд.
Вер минэман шенгк лдэсялдалд,
Улда ма хосяем нанг,
Вантлдэм хоты рупитты саманг».
Улдмитас Балдда пупалд хотан,
Торан элдты атат олдлдыйлд.
Нялд хоят арат лдув лдэвантыйлд,
Лдапат хоят юуран лдув рупитыйлд.
Алданг хутли алданг унты – иса морт;
Лдоовалд нох киралд, нянь лант хар хиралд,
Кууралд нох алдалд, мостат лдэсяталд, лдутасалд, Карнг пошхат каврталд, карлдалд нох хопиталд.
Пуп имина Балддайл ишакалда,
Туп Балдда пуп имина шенгк шалитлда,
Пуп ики похна асия айлдлда:
Солдаматан каварлда, ёш тайн няврэмалд тайлда.
Пуп икина Балдда туп ант рахалдлда,
Ям ясанган тёпиман ант ясталда.
Миталд сохаптаты элдты нумасалд:
Порайлд сора хасялд, морталд ешаулд си ёхаталд.
Пупалд ант лдэлд, ант инсялд, атат ант олдалд:
Веншлохталд кумлды туп такан хэраскийлд.
Сялдта, имелда ясталд:
«Ситы-тамиты: муй верты нэрылдам?»
Имелд сойнг унтралд* тумайнг,
Камн сир мутра верты шенгк ойнг.
Пуп имелд ясталд: «Уйтлдэм хоты лдувелд арматты:
Хоты мунг элдтэв симась наклдат пунглда пайтты:
Парты Балддаен ант верлдангалд*
рупата верты,
Ясты лдувелда си вералд торлдыя верты.
Ситэнна веншлохтэн талданга хасялд
Па Балддаен мит таклды пунглдая маналд».
